Նորություններ

Դատավորին ինքնաբացարկ հայտնեցին տուժողի իրավահաջորդը, պաշտպանները և 5 ամբաստանյալները

19.07.2012

Արտակ Նազարյանի մահվան գործով դատավարություն. հուլիսի 18, 2012թ.

Դատավորի նկատմամբ ինքնաբացարկի միջնորդության վերաբերյալ որոշումը կհրապարակվի այսօր. հուլիսի 18–ին շարունակվեց Արտակ Նազարյանի մահվան գործով դատավարությունը, որի ընթացքում հրապարակվեցին քրեական գործում առկա ապացույցները:

Լեյտենանտ Վահագն Հայրապետյանի պաշտպան Լևոն Պողոսյանը և կապիտան Հակոբ Մանուկյանի պաշտպան Հրանտ Գևորգյանը միջնորդեցին, որ դատարանում յուրաքանչյուր ապացույցի հրապարակումից հետո կատարվի դրա հետազոտությունը, հետո անցում կատարվի այլ ապացույցների հրապարակմանը: Դատավոր Սամվել Մարդանյանն իր իրավասության շրջանակում որոշեց բոլոր ապացույցների հրապարակումից հետո միայն անցնել դրանց հետազոտությանը:

Դատարանում հրապարակվեց Արտակ Նազարյանի ծոցատետրից պոկված, Արտակ Նազարյանին վերագրված գրության դատական փորձաքննության եզրակացությունը: Ծոցատետրից պոկված թերթում գրված է հետևյալը. «Այս քայլին ես դիմել եմ ստիպված, հոգնած ամեն, ամեն, ամեն ինչից, իմ ծնողների դաստիարակությունից, կյանքում տեղս չգտնելուց, երազել չկարողանալուց: Ոչ ոք մեղավոր չէ, ոչ ոք, միայն ես ու իմ ծնողները»: Նշենք, որ նոթատետրը և գրությունը Արտակ Նազարյանի գրպանից հանել է գումարտակի հրամանատարի տեղակալ Հակոբ Մանուկյանը, այն տվել գումարտակի շտաբի պետի պաշտոնակատար Միհրան Նաջարյանին, վերջինս փոխանցել է գումարտակի հրամանատար Միշա Գաբրիելյանին, նա էլ օրեր անց նոր հանձնել է քննիչներին:

Արտակ Նազարյանի ինքնաձիգի,պարկուճի դատական փորձաքննության եզրակացությունը հրապարակելու ժամանակ մեղադրող Հարություն Հարությունյանը սկսեց բացատրել, որ պարկուճի համարը մյուս կողմից կարդալիս համընկնում է քրեական գործում եղած պարկուճի համարի հետ: Դրանով նա փորձում էր ցույց տալ, որ տուժողի իրավահաջորդի ներկայացուցիչ, իրավապաշտպան Ռուբեն Մարտիրոսյանի հիմնավորումները,թե քրեական գործում առկա պարկուճը դատական փորձաքննության փուլում փոխվել է, չեն համապատասխանում իրականությանը:

Դատախազի բացատրությունը առաջացրեց տուժողի իրավահաջորդ, իրավապաշտպան Ռուբեն Մարտիրոսյանի դժգոհությունը, քանի որ այդ փուլում դատավորը թույլատրել էր միայն ապացույցների հրապարակումը, և ոչ` հետազոտումը: Ռուբեն Մարտիրոսյանը դատավորին հարցրեց, թե ինչո՞ւ է նա դատախազին թույլ տալիս բացատրություններ ներկայացնել: Դատավորի և Ռուբեն Մարտիրոսյանի մեջ վեճ բորբոքվեց: Դատավորը, դատական սանկցիա կիրառելով, իրավապաշտպանին դահլիճից դուրս հրավիրեց:

Տուժողի իրավահաջորդ Ծովինար Նազարյանը զայրացած հայտարարեց, որ դատարանն ամեն ինչ անում է, որ տուժող կողմը մեկուսացվի այս գործից: Ծովինար Նազարյանի խոսքերով` ինքն այնպիսի տպավորություն է ստանում, որ դատվում են Արտակ Նազարյանը և նրա ընտանիքը: Ծովինար Նազարյանը Սամվել Մարդանյանին մեղադրելով կողմնակալ վերաբերմունքի, մեղադրողի շահերը, նրա ներկայացրած կեղծ մեղադրանքը պաշտպանելու համար` դատավորին ինքնաբացարկ հայտնեց: Ծովինարը դատավորին մեղադրեց, որ վերջինս տնայնագործական եղանակով է դատը վարում և երկու անգամ նրան հորդորեց «շառ ու փորձանքից հեռու մնալ» և իր մասնագիտական պատիվը պաշտպանելու համար բավարարել ինքնաբացարկի միջնորդությունը:

Պաշտպաններ Հրանտ Գևորգյանը, Լևոն Պողոսյանը և ամբաստանյալ 5 զինծառայողները միացան ինքնաբացարկի միջնորդությանը, իսկ մեղադրող Հարություն Հարությունյանն այդ միջնորդությանը դեմ էր: Պաշտպան Գևորգյանը դատավորին հիշեցրեց, որ ինքը նախկինում 3 անգամ նրան ինքնաբացարկ է հայտնել, քանի որ դատարանը չի առաջնորդվում քրեական դատավարության նորմերով:

Դատավորը ինքնաբացարկի միջնորդության վերաբերյալ որոշում կայացնելու համար հեռացավ խորհրդակցական սենյակ: Այդ միջնորդության վերաբերյալ դատարանի որոշումը կհրապարակվի հուլիսի 19-ին:

Ոսկան Սարգսյան
Իջևան

Աղբյուրը՝ www.hra.am