Նորություններ

Երևանի ավագանու ընտրությունների նախնական արդյունքները

06.05.2013

Մայիսի 6-ին, ժամը 10։00-ին Կենտրոնական ընտրական հանձնաժողովն ամփոփել է Երևանի ավագանու ընտրությունների նախնական արդյունքները:

Բոլոր 464 ընտրատեղամասերից ստացված նախնական արդյունքներով՝ հավաքած քվեների թվով առաջատարը Հայաստանի հանրապետական կուսակցությունը, «Բարգավաճ Հայաստան» կուսակցությունը և «Բարև, Երևան» դաշինքն են: Հենց այս ուժերից էլ կկազմվի Երևանի ավագանին:

Կուսակցությունների և կուսակցությունների դաշինքների ստացած կողմ քվեաթերթիկների թիվը՝

Հայաստանի հանրապետական կուսակցություն – 235.512 (55,89 տոկոս)

«Բարգավաճ Հայաստան» կուսակցություն – 97.189 (23,07 տոկոս)

«Բարև, Երևան» կուսակցությունների դաշինք – 35.732 (8,48 տոկոս)

«Հայ ազգային կոնգրես» կուսակցություն – 18.499 (4,39 տոկոս)

Հայ հեղափոխական դաշնակցություն կուսակցություն – 15.999 (3,80 տոկոս)

«Օրինաց երկիր» կուսակցություն – 15.733 (3,73 տոկոս)

«Առաքելություն» կուսակցություն – 2.692 (0,64 տոկոս)

ՀՀ օրենսդրության համաձայն՝ Երևանի ավագանու ընտրություններում կուսակցությունների համար անցողիկ շեմը 6 տոկոսն է, իսկ կուսակցությունների դաշինքների համար՝ 8 տոկոսը: Այսպիսով՝ Երևանի ավագանու կազմում կլինեն միայն ՀՀԿ-ն, ԲՀԿ-ն և «Բարև, Երևան» դաշինքը:

Օրենքը սահմանում է նաև, որ 50 տոկոսից ավելի ձայներ հավաքած քաղաքական ուժի ցուցակը գլխավորող թեկնածուն դառնում է Երևանի քաղաքապետ։ Նախնական արդյունքների համաձայն` ՀՀԿ նախընտրական ցուցակը գլխավորող Տարոն Մարգարյանը վերընտրվել է քաղաքապետի պաշտոնում:

Ըստ ՀՀ ոստիկանության հրապարակած վերջնական տվյալների՝ ընտրողների ընդհանուր թիվը եղել է 816.478։ Նախնական տվյալներով՝ քվեարկությանը մասնակցել է ընտրողների 53,55 տոկոսը՝ 437.212 ընտրող։

Քվեատուփում առկա սահմանված նմուշի ծրարների թիվը եղել ՝ 436.590, անվավեր քվեաթերթիկների թիվը՝ 15.250: Տեղամասային ընտրական հանձնաժողովներում մարված քվեաթերթիկների ընդհանուր թիվը՝ 391.039 է։

Նշենք, որ Երևանի ավագանու ընտրությունների վերջնական արդյունքները ԿԸՀ–ն կներկայացնի քվեարկության օրից հետո՝ 7-րդ օրը, այսինքն՝ մայիսի 12-ին:

Աղբյուրը՝ www.hra.am