Հարցազրույց

Գործում կասկածելի շատ են իրականությունը կոծկող «պատահականությունները»

15.07.2013

Photo by Aysor.am

Հարցազրույց ընտանեկան բռնության զոհ Մարո Գուլոյանի իրավահաջորդի ներկայացուցիչ, փաստաբան Լուսինե Մինասյանի հետ։

Ի՞նչ հիմքերով էր կարճվել Մարո Գուլոյանի գործը, և ինչպե՞ս հասաք գործի վերաբացմանը:

Գործը կարճվել էր հանցակազմի բացակայության հիմքով, սակայն նախաքննության մարմինը բազմակողմանի քննություն չէր իրականացրել. բազմաթիվ թերություններ կային, օրինակ՝ նախաքննության մարմինն ինչ-ինչ պատճառներով չէր նկատել շատ փաստեր, որոնց մասին մենք բարձրաձայնում էինք: Հակասություններ կային վկաների տված ցուցմունքներում՝ դեպքի ժամի, Մարո Գուլոյանին հիվանդանոց տեղափոխելու վերաբերյալ: Այդ հակասությունները նախաքննության մարմինը կա՛մ չէր նկատել, կա՛մ չէր ցանկացել նկատել՝ բացահայտելու ու պարզաբանելու համար: Եվ անհասկանալի պատճառներով գործը կարճվեց: Մենք դիմեցինք դատախազություն՝ կարճման որոշումը բողոքարկելու համար, և մեր պահանջը բավարարվեց: Սա նշանակում է, որ դատախազությունն էլ հաստատեց, որ նախաքննության ժամանակ թերություններ ու խախտումներ են եղել:

Ըստ Ձեզ՝ ի՞նչ թերություններ են եղել նախաքննության մարմնի կողմից:

Նախաքննության մարմնի աշխատանքներում մի շարք թերություններ են եղել: Այդ մարմինը, կարծես, զուտ ձևական էր իրականացնում քննությունը՝ առանց տարբեր հանգամանքների համադրումների և վերլուծությունների: Սրան գումարվում էր նաև տարբեր փորձաքննությունների երկարատև ընթացքը:

Դատաբժշկական փորձագետներն էին շատ ագրեսիվ, պաշտպանողական դիրք բռնել: Օրինակ՝ երբ մենք պահանջեցինք կրկնակի դատաբժշկական փորձաքննություն իրականացրած դատաբժշկին հարցաքննել իր տված եզրակացության որոշ հարցերի շուրջ, ստացված պատասխանները մեծ մասամբ կապ չունեին մեր առաջադրած բժշկական բնույթի հարցերի հետ:

Սա համատարած խնդիր է, և այսօր դժվար է հասնել նրան, որ որևէ դատաբժիշկ հաստատի իր կոլեգայի կողմից թույլ տրված էական սխալը, խախտումը:

Նշեմ նաև, որ դատաբժշկական փորձաքննության եզրակացությանը կցված չեն դիակի լուսանկարները, որը պարտադիր է բոլոր քրեական գործերում: Իսկ այստեղ այն բացակայում է՝ «ժապավենը լուսանկարելիս վնասվելու» պատճառաբանությամբ:

Այս գործում ինչ-որ շատ են այս տեսակ իրականությունը կոծկող «պատահականությունները»:

Ներկայումս ձեր և տուժողի իրավահաջորդի առաջնային խնդիրները որո՞նք են այս գործի շրջանակներում:

Այս պահի դրությամբ՝ մեր առաջնային նպատակն է ամեն կերպ գործի քննությունը տեղափոխել Երևան, այսինքն՝ եթե դատախազությունը գտել է, որ նախաքննության մարմինը բացթողումներ է թույլ տվել, և գործի քննությունը նորից հանձնարարում է նույն մարմնին, դա առնվազն աբսուրդ է:

Մենք արդեն գրավոր դիմել ենք ՀՀ գլխավոր դատախազին՝ նախաքննությունը Կոտայքի մարզից Երևան տեղափոխելու խնդրանքով։ Սա վերջին տարբերակն է, որը կարող է ապահովել բազմակողմանի և օբյեկտիվ քննություն, և մենք հուսով ենք, որ դատախազությունն ընդառաջ կգնա մեր հիմնավորված պահանջին և, միգուցե, այս գործի նորմալ քննության ընթացքում կբացահայտվի տեղի ունեցածը:

Ի՞նչ հիմքեր ունեք կարծելու, որ Մարո Գուլոյանը ոչ թե ինքնասպան է եղել, այլ նրան սպանել է ամուսինը: Կոնկրետ փաստեր կա՞ն:

Մենք չենք պնդում, որ ամուսինն է սպանել Մարո Գուլոյանին: Մենք պարզապես ցանկանում ենք, որ բազմակողմանի և օբյեկտիվ քննություն իրականացվի, քանի որ բազմաթիվ հանգամանքներ կան, որոնք կասկած են հարուցում ինքնասպանության վարկածի վերաբերյալ: Մեկը ես արդեն նշեցի՝ դա վկաների տրված ցուցմունքներում առկա հակասություններն են: Մյուս կասկածելի հանգամանքը ինքնասպանության պատճառն է, որը հիմք ընդունելով՝ գործը կարճվել է:

Ինքնասպանության պատճառը, ըստ նախաքննության, այն է, որ, իբր, երկու օր առաջ Մարոն խնդրում է ամուսնուն իրեն օգնել գորգը լավանալ, ամուսինը հրաժարվում է օգնել և դրանից նեղվելով՝ Մարոն ինքնասպանություն է գործում:

Մյուս պատճառաբանությունն էլ այն է, որ Մարոյի մայրը հոգեկան շեղումներ է ունեցել, բայց այդ կինը Մարոյի խորթ մայրն է եղել, և գենետիկական կապ չկա նրանց միջև, և Մարոյի երկու եղբայրները նույնպես ինքնասպանություն են գործել, բայց այդ տղաները Մարոյի խորթ եղբայրներն են՝ նրա հոր առաջին կնոջից:

Այս փաստերի վրա հիմնվելով, սա ընդունելով որպես ժառանգական հիվանդություն՝ նախաքննական մարմինը ենթադրել է, որ դա, միգուցե, ժառանգական է, և Մարոն կարող էր ինքնասպանություն գործել: Սակայն նախաքննության մարմինը որևէ գենետիկական փորձաքննություն չի նշանակել կամ տեղեկություններ հավաքագրել Մարոյի հոգեկան առողջության վերաբերյալ:

Ըստ ձեզ՝ նախաքննության մարմնի կողմից թույլ տրված թերություններն ինչի՞ արդյունք են:

Կա երկու տարբերակ՝ օրենքի խախտում անտեղյակության պատճառով կամ դիտավորյալ՝ հաշվի առնելով Մարոյի ամուսնու ազգակցական կապը Աբովյանի հայտնի Գուլոյանների հետ:

Սակայն երկու տարբերակում էլ հետևությունը մեկն է` տեղի են ունեցել օրենքի էական խախտումներ, և Կոտայքի մարզը չպետք է շարունակի գործով քննություն իրականացնել:

Հարցազրույցը՝ Մարիամ Սարգսյանի

Աղբյուրը՝ www.hra.am