Լևոն Գուլյան

Հատուկ քննչական ծառայությունը 2011թ. սեպտեմբերի 8-ին վերսկսել է Լևոն Գուլյանի մահվան գործի վարույթը։

Գործի ընդհանուր նկարագրություն

2007թ. մայիսի 9-ին Լևոն Գուլյանը դարձել էր Ստեփան Վարդանյանի սպանության ականատես։ Սպանությունը տեղի էր ունեցել ծեծկռտուքի ժամանակ Լևոն Գուլյանի ռեստորանի առջև: Որպես սպանության ականատես՝ Լևոն Գուլյանը և նրա երկու աշխատողները' Հայկ Մելքումյանը և Մարինե Գրիգորյանը, հրավիրվել էին ոստիկանության Շենգավիթի բաժին: Այնտեղ Գուլյանը գրավոր ցուցմունքներ է տվել, սակայն պահվել է ոստիկանության բաժնում մինչև մայիսի 10-ի ուշ երեկո: Դրանից հետո նրան երկու անգամ թույլ են տվել տուն գնալ, սակայն պահանջել են, որ նա վերադառնա։ Երկու դեպքում էլ Լևոն Գուլյանը ենթարկվել է պահանջին: Երկրորդ անգամ տեղական ոստիկանության բաժին վերադառնալուց հետո Լևոն Գուլյանը տեղափոխվել է ՀՀ Ոստիկանության շենք' ՀՀ Ոստիկանության քրեական հետախուզության գլխավոր վարչության պետի տեղակալ Հովհաննես Թամամյանի կարգադրության հիման վրա:

Մայիսի 12-ին ժամը 17.00-ի սահմաններում Լևոն Գուլյանի ընտանիքին հայտնել են, որ նա մահացել է: Ոստիկանության ծառայողները պնդել են, որ Գուլյանը ինքնասպան է եղել կամ փորձել է փախչել' թռնելով երկրորդ հարկից: Հաշվի առնելով այն փաստը, որ Գուլյանի հարազատները կապտուկներ էին տեսել իր մարմնի վրա, երբ նա տուն էր վերադարձել, և այն, որ Հայկ Մելքումյանը դաժան ծեծի էր ենթարկվել ոստիկանության բաժնում' Լևոն Գուլյանի ընտանիքը կասկածում է, որ մինչև լուսամուտից ընկնելը նա դաժան վերաբերմունքի է ենթարկվել Ոստիկանության ծառայողների կողմից:

Փաստաբանները, որոնք ներկա են գտնվել դիակի դատաբժշկական փորձաքննությանը, հրաժարվել են մանրամասներ ներկայացնելուց, սակայն նրանք հայտնել են, որ մարմնի վրա բռնության հետքեր են եղել:

2007թ.-ից ի վեր իրականացվում է նախաքննություն, որի ընթացքում գործը մի քանի անգամ կարճվել է նախաքննություն իրականացնող մարմնի կողմից և վերաբացվել է դատարանների որոշումներով:

Վերջին անգամ' 2010թ.-ի օգոստոսին, ՀՀ Վճռաբեկ դատարանը որոշեց, որ գործը պետք է վերադարձվի դատախազություն՝ նախաքննություն սկսելու համար, սակայն 2011թ.-ի մարտ ամսին գործը կրկին կարճվեց:

02.05.2011 տուժողի իրավահաջորդներ Ա. Կարախանյանն ու Հ. Ղուկասյանը բողոքարկել են գործը կարճելու մասին որոշումը Երևան քաղաքի Կենտրոն և Նորք-Մարաշ համայնքների ընդհանուր իրավասության դատարան։

Մայիսի 13-ին Կենտրոն և Նորք-Մարաշ համայնքների ընդհանուր իրավասության դատարանում սկսվեց տուժողի իրավահաջորդների բողոքի քննությունը։ Ավագ դատախազ Հարություն Հարությունյանը դատարանում մեկնաբանեց, որ «ոստիկաններից որևէ մեկի արարքում հանցակազմ չեն գտել», հետևաբար՝ հանցակազմի բացակայության պատճառաբանությամբ կարճվել է գործը։

Մայիսի 25-ին Կենտրոն և Նորք Մարաշ առաջին ատյանի դատարանի դատավոր Խանդանյանը վճռեց բավարարել Լևոն Գուլյանի իրավահաջորդների ներկայացուցիչների բողոքը և պարտավորեցրեց Հատուկ քննչական ծառայութանը վերսկսել գործի քննությունը:

Այս վճիռը դատախազությունը բողոքարկեց ՀՀ վերաքննիչ քրեական դատարանում։ 2011թ. հունիսի 30-ին Վերաքննիչ դատարանը մերժեց բողոքը՝ ուժի մեջ թողնելով առաջին ատյանի դատարանի մայիսի 25-ի վճիռը։

Հատուկ քննչական ծառայությունը 2011թ. սեպտեմբերի 8-ին վերսկսել է Լևոն Գուլյանի մահվան գործի վարույթը։

Այս գործին բազմիցս անդրադարձել են միջազգային և տեղական իրավապաշտպան կազմակերպությունները իրենց զեկույցներում։ Վերջին անգամ՝ 2011թ. մայիսի 12-ին, Լևոն Գուլյանի մահվան 4-րդ տարելիցի կապակցությամբ՝ FIDH-ը, Քաղաքացիական հասարակության ինստիտուտը և Հայաստանի հելսինկյան կոմիտեն հանդես եկան համատեղ հայտարարությամբ, որում կոչ էին անում ՀՀ իշխանություններին՝ իրականացնել Լևոն Գուլյանի մահվան հանգամանքների նոր, թափանցիկ և արդյունավետ քննություն և պատասխանատվության ենթարկել մեղավորներին։

Գործի ամբողջական ժամանակագրությունը

 

  • Հատուկ քննչական ծառայությանը 4 ամիս է հարկավոր հարցումներ ուղարկելու համար

     12.01.2012
    ՀՀ հատուկ քննչական ծառայության ՀԿԳ քննիչ Գաբրիել Պետրոսյանից 4 ամիս է պահանջվել, որպեսզի քննչական գործողություններին անհրաժեշտ մանեկեն ձեռքբերելու համար հարցումներ ուղարկի: Չնայած Վճռաբեկ դատարանը դեռևս 2010թ. օգոստոսի 27-ին որոշում է կայացրել, որ պետք է մի շարք գործողություններ իրականացվեն գործի քննության շրջանակներում, դեռևս ոչինչ չի արվել: Հատուկ քննչական ծառայությունն այս գործը փակ շրջանի մեջ է դրել։

  • Թող դատարանն էլ իրականացնի նախաքննություն. առաջարկում է ավագ դատախազ Հարություն Հարությունյանը

     30.06.2011
    ՀՀ Վերաքննիչ քրեական դատարանը (նախագահող դատավոր՝ Խաչատրյան) մերժեց ՀՀ գլխավոր դատախազության՝ Գուլյանի գործով բողոքը։ Հ. Հարությունյանի խոսքով՝ դատախազությունը միանշանակ բողոքարկելու է այն։

  • ՀՀ գլխավոր դատախազությունը բողոքարկել է Գուլյանի գործով վճիռը

     29.06.2011
    ՀՀ գլխավոր դատախազությունը բողոքարկել է առաջին ատյանի դատարանի վճիռը, որով բավարարվել էր Լևոն Գուլյանի իրավահաջորդների ներկայացուցիչների բողոքը։ Վերաքննիչ քրեական դատարանում (դատավոր՝ Խաչատրյան) նշանակված հունիսի 23-ի դատական նիստը հետաձգվել էր։ Հաջորդ նիստը տեղի կունենա վաղը՝ հունիսի 30-ին։

  • Հունիսի 26. խոշտանգումների զոհերի աջակցության միջազգային օր (վիդեո)

     26.06.2011
    Հայաստանում չկա վիճակագրություն, թե տարեկան քանի մարդ է խոշտանգվում: Խոշտանգման դեպքերի մասին տուժողները հաճախ չեն բարձրաձայնում: Բռնություն կիրառողները հազվադեպ են պատասխանատվության ենթարկվում, իսկ տուժողները վախենում են, որ բարձրաձայնելը կարող է ավելի ծանր հետևանքների հանգեցնել։

  • Դատավոր Խանդանյանը բավարարեց Գուլյանի իրավահաջորդի բողոքը

     25.05.2011
    Այս գործը մշտապես վարում է Հատուկ քննչական ծառայութան քննիչ Գաբրիել Պետրոսյանը: Իրավիճակը շտկելու համար ՀՀ գլխավոր դատախազ Աղվան Հովսեփյանն առնվազն պետք է իրացնի իրեն ի պաշտոնե տրված իրավունքը և գոնե այս անգամ՝ չորրորդ անգամ, այլ քննիչի հանձնարարի դատարանի որոշումը կատարելու պարտավորությունը:

  • Հատուկ քննչական ծառայություն. «Լևոն Գուլյանը նպատակասլաց գործողություններ է արել, որոնք հնարավոր չէ մանեկենով վերարտադրել»

     17.05.2011
    Ավագ դատախազ Հարությունյանի մեկնաբանմամբ' ոստիկաններից որեւէ մեկի արարքում հանցակազմ չգտելու հիմքով գործը չի քննվել: Իսկ թե ինչու չի կատարվել Վճռաբեկ դատարանի որոշումը ու քայլեր ձեռնարկվել մանեկեն ձեռքբերելու և փորձարարություն կատարելու համար, պարզաբանվեց այսպես. «Գուլյանը նպատակասլաց գործողություն է արել, որոնք հնարավոր չէ մանեկենով վերարտադրել»։

  • Դատախազությունը չէր հասցրել իր դիրքորոշումը ներկայացնել դատարան

     16.05.2011
    «Իսկապես չհասցրեցի Գլխավոր դատախազության վարչական շենք մտնել ու նոր գալ դատարան, շատ ծանրաբեռնված ենք մենք։ Հիմա եկել եմ,որ հաջորդ նիստի օրը համաձայնեցնենք»,- hra.am-ին պարզաբանեց ՀՀ գլխավոր դատախազության ավագ դատախազ Հարություն Հարությունյանը։

  • FIDH–ը, Քաղաքացիական հասարակության ինստիտուտը և Հայաստանի հելսինկյան կոմիտեն պահանջում են իշխանություններից նոր քննություն իրականացնել Լևոն Գուլյանի գործով

     12.05.2011
    Մարդու իրավունքների միջազգային ֆեդերացիան (FIDH), իր անդամ կազմակերպություն Քաղաքացիական հասարակության ինստիտուտը և Հայաստանի հելսինկյան կոմիտեն կոչ են անում ՀՀ իշխանություններին իրականացնել Լևոն Գուլյանի մահվան հանգամանքների նոր, թափանցիկ և արդյունավետ քննություն, պատասխանատվության ենթարկել մեղավորներին, գործել Մարդու իրավունքների եվրոպական կոնվենցիայի, ինչպես նաև՝ Խոշտանգումների կանխարգելման եվրոպական կոնվենցիայի և ՄԱԿ-ի Խոշտանգումների և այլ դաժան, անմարդկային կամ արժանապատվությունը նվաստացնող վերաբերմունքի դեմ կոնվենցիայի դրույթների համաձայն՝ իրականացնելով խոշտանգումների դեպքերի լիարժեք քննություն։

  • 4 տարի անց. Գուլյանի մահվան հանգամանքները դեռեւս պարզված չեն (վիդեո)

     11.05.2011
    «Ես չեմ հավատում, որ ոստիկանությունը չի կարող բացահայտել մի հանցագործություն, որը տեղի է ունեցել ոստիկանապետի աշխատասենյակից մի քանի մետր հեռավորության վրա։ Ուղղակի չեն ուզում բացահայտել ու կիրառում են ձգձգումների պրակտիկան, մինչև հետամուտ լինող մարդիկ հանձնվում են՝ հոգնելով այդ ամենից։ Ես ուզում եմ վստահեցնել, որ մենք հետևողական ենք լինելու»,- ասում է «Քաղաքացիական հասարակության ինստիտուտ» ՀԿ-ի ղեկավար Արման Դանիելյանը։

  • Հաջորդ