Գևորգ Կոծինյան

Գործի նկարագրությունը

2011թ. դեկտեմբերին գործն ուղարկվել է ՀՀ վերաքննիչ քրեական դատարան և վարույթ ընդունվել (նախագահող դատավոր՝ Սերգեյ Չիչոյան): Դեկտեմբերի 26-ին նշանակված նախնական դատական նիստը հետաձգվել է, նիստի նոր օր դեռևս նշանակված չէ:

Գործի նկարագրություն

2011թ. փետրվարի 6-ին ԼՂՀ պաշտպանության բանակի Արայի լեռ զորամասում սպանվել է  ժամկետային զինծառայող, 1992թ. ծնված շարքային Գևորգ Անդրանիկի Կոծինյանը (բանակ է զորակոչվել 2010թ. մայիսի 12-ին, Վանաձորի զինկոմիսարիատի կողմից):

Դատաբժշկական փորձաքննության եզրակացության համաձայն՝ նրա մահվան պատճառը սրտի ռեֆլեկտոր կանգն է, որը կրծքավանդակի փակ, բութ վնասվածքի հետևանք է:

Ըստ պաշտոնական վարկածի՝ ոգելից խմիչքի ազդեցության տակ սերժանտ Մարգար Դավթյանը, շարքայիններ Տարոն Սուվարյանը և Վահե Աղաջանյանը վեճի են բռնվել Կոծինյանի հետ զորանոցում ծխելու, իրենց հետ խոսելիս բարբառ օգտագործելու և ինչ-որ շարժումներ անելու պատճառով: Նրանք զորանոցի մոտ ծեծի են ենթարկել Կոծինյանին' դիտավորությամբ պատճառելով կյանքի համար վտանգավոր մարմնական վնասվածքներ, որն անզգուշությամբ առաջացրել է վերջինիս մահը:

2011թ. փետրվարի 8-ին փաստի առթիվ քրեական գործ է հարուցվել:

Շարքային Տարոն Սուվարյանին և Վահե Աղաջանյանին մեղադրանք է առաջադրվել ՀՀ ՔՕ 359-րդ հոդվածի 2-րդ մասի 2-րդ կետով (զինծառայողների փոխհարաբերությունների կանոնագրքային կանոնները խախտելը' նրանց միջև ստորադասային հարաբերության բացակայության դեպքում) և 112-րդ հոդվածի 2-րդ մասի 6, 9, 14-րդ կետերով (դիտավորությամբ առողջությանը ծանր վնաս պատճառելը, որը կատարվել է մի խումբ անձանց կամ կազմակերպված խմբի կողմից՝ անզգուշությամբ առաջացնելով տուժողի մահը):

Սերժանտ Մարգար Դավթյանին մեղադրանք է առաջադրվել ՀՀ ՔՕ 38-րդ հոդվածով և 359-րդ հոդվածի 2-րդ մասի 2-րդ կետով, 112-րդ հոդվածի 2-րդ մասի 6, 9, 14-րդ կետերով, ինչպես նաև՝ ՔՕ 375-րդ հոդվածի 1-ին մասով (իշխանազանցություն):  

Իշխանազանցության  (ՔՕ 375-րդ հոդվածի 1-ին մաս) մեղադրանք է առաջադրվել նաև Արմեն Ռաֆայելյանի նկատմամբ քանի որ նա, հանդիսանալով հրամանատար, ժամանակին չի կանխել իր նկատմամբ ստորադաս հանդիսացող երեք զինծառայողների և մյուսների կողմից ոգելից խմիչք օգտագործելը, որի հետևանքով Կոծինյանը մահացել է:

Բոլոր մեղադրյալների նկատմամբ որպես խափանման միջոց ընտրվել է կալանավորումը: Տուժողի իրավահաջորդն է Գևորգ Կոծինյանի քեռին՝ Բորիս Ադամյանը:  Գործը դատարան է ուղարկվել 2011թ. հունիսի 16-ին։

2011թ. նոյեմբերի 14-ին Սյունիքի մարզի ընդհանուր իրավասության դատարանը (նստավայրը՝ Ստեփանակերտ,  նախագահող դատավոր՝ Լեռնիկ Աթանյան) հրապարակել է վճիռը, որով 4 ամբաստանյալներին մեղավոր է ճանաչել  նրանց առաջադրված հոդվածներով:  

Դատարանի վճռով՝ կրտսեր սերժանտ Մարգար Դավթյանը դատապարտվել է 11 տարի 6 ամիս, շարքայիններ Տարոն Սուվարյանը և Վահե Աղաջանյանը՝ 11 տարի, իսկ ավագ լեյտենանտ Արմեն Ռաֆայելյանը՝ 3 տարի ժամկետով ազատազրկման։ Արմեն Ռաֆայելյանի նկատմամբ կիրառվել է 2011թ. մայիսին ՀՀ ազգային ժողովի կողմից ընդունված համաներման 1-ին կետի 1-ին ենթակետը և նա ազատվել է պատժի կրումից:

2011թ. դեկտեմբերին գործն ուղարկվել է ՀՀ վերաքննիչ քրեական դատարան և վարույթ ընդունվել (նախագահող դատավոր՝ Սերգեյ Չիչոյան): Դեկտեմբերի 26-ին նշանակված նախնական դատական նիստը հետաձգվել է:

Տուժողի իրավահաջորդը վերաքննիչ բողոքով պահանջում է ճանաչել Գևորգ Կոծինյանի կյանքի իրավունքի խախտման փաստը և որպես բարոյական վնասի փոխհատուցում պետությունից բռնագաձել 5 միլիոն դրամ, իսկ ամբաստանյալներից հօգուտ տուժողի իրավահաջորդի բռնագաձել 1,5 միլիոն դրամ՝ որպես հուղարկավորության, և 450 հազար դրամ՝ որպես դատական ծախսերի փոխհատուցում:

  • Կոծինյանի գործով հրապարակվել են վերաքննիչ բողոքները

    19.03.2012 | Նորություններ
    Մարտի 15-ին ՀՀ վերաքննիչ քրեական դատարանում (նախագահող դատավոր՝ Սերգեյ Չիչոյան) հրապարակվել են չորս համածառայակիցների կողմից ծեծվելու հետևանքով մահացած զինծայայող Գևորգ Կոծինյանի գործով վերաքննիչ բողոքները: 

  • Պահանջում են ճանաչել զինվորի կյանքի իրավունքի խախտման փաստը

    20.01.2012 | Նորություններ
    ՀՀ վերաքննիչ քրեական դատարանը դեկտեմբերին վարույթ է ընդունել չորս համածառայակիցների կողմից ծեծվելու հետևանքով մահացած զինծայայող Գևորգ Կոծինյանի գործը (նախագահող դատավոր՝ Սերգեյ Չիչոյան): Դեկտեմբերի 26-ին նշանակված նախնական դատական նիստը հետաձգվել է, նիստի նոր օր դեռ նշանակված չէ: Վերաքննիչ բողոք են բերել գործի երկու կողմերն էլ:

  • Վճիռ Գ. Կոծինյանի մահվան գործով. դատարանի որոշումից գոհ են մասամբ

    02.12.2011 | Նորություններ
    Ժամկետային զինծառայող Գևորգ Կոծինյանի մահվան մեջ մեղադրվող զինծառայողների մեղքն արդեն ապացուցված է համարվում դատարանի կողմից: «Բողոքարկելու ենք դատավճիռը բայց ոչ թե պատժի, այլ բարոյական վնասի փոխհատուցման մասով, ինչպես նաև բողոքարկելու ենք այն մասով, որ դատարանը գնահատական տա այն հանգամանքին, որ կոնկրետ ճանաչի Կոծինյանի կյանքի իրավունքի խախտումը»,- www.hra.am -ին հաղորդեց Գ. Կոծինյանի իրավահաջորդի ներկայացուցիչ Էդմոն Մարուքյանը:

  • Չորս զինծառայող է ձերբակալվել հայ զինվորի մահվան գործով

    11.02.2011 | Նորություններ
    Գ.Կոստանյանը նշել է, որ անձամբ է վերահսկելու այս գործի քննության օրինականությունն ու օբյեկտիվությունը: Կոստանյանը հավաստել է նաև, որ ձեռնարկելու է հնարավոր բոլոր միջոցները օբյեկտիվ քննության անցկացման համար:

  • Նոր սպանություն բանակում

    09.02.2011 | Նորություններ
    ՀՀ ՊՆ քննչական վարչության մամուլի քարտուղար Մերի Սարգսյանը www.hra.am-ին հաղորդեց, որ դեպքի առթիվ հարուցվել է քրեական գործ քրեական օրենսգրքի 359 հոդվածի 2-րդ մասին 2-րդ կետով և 112-րդ հոդվածի երկրորդ մասի 6-րդ և 14-րդ կետերով:

  • Պաշտպանության բանակը հաղորդում է

    09.02.2011 | Նորություններ
    Փետրվարի 6-ին ՊԲ հարավային ուղղությամբ տեղակայված զորամասերից մեկում տեղի ունեցած արտակարգ միջադեպի հետևանքով մահացել է ժամկետային զինծառայող, 1992թ. ծնված, շարքային Գևորգ Անդրանիկի Կոտինյանը: Դեպքի մանրամասները պարզելու համար տարվում է հետաքննություն:

  • Զինվորը մահացել է բռնության արդյունքում

    09.02.2011 | Տեսանկյուն
    Փետրվարի 6-ին ԼՂ-ի Հադրութի զորամասերից մեկում զինծառայողների կողմից ծեծի ու խոշտանգման արդյունքում մահացել է 1992 թվականին ծնված ժամկետային զինծառայող Գևորգ Անդրանիկի Կոտինյանը: Վանաձորցի Գևորգ Կոտինյանը բանակ էր զորակոչվել 2010-ի մայիսի 12-ին: