Սաշա Դավթյանին և նրա դուստրերին խոշտանգումների ենթարկած ոստիկաններից որևէ մեկն առ այսօր պատասխանատվության չի ենթարկվել:
Գործի ընդհանուր նկարագրություն
2008թ. սեպտեմբերին քրեական գործ է հարուցվել Արագածոտնի մարզի Կաթնաղբյուր գյուղում բնակվող անչափահաս աղջկան բռնաբարելու փաստի կապակցությամբ։ 2009թ. փետրվարի 6-ին գործը կասեցվել էր՝ հանցագործի անձը պարզված չլինելու հիմքով։ 2009թ. մայիսին դատական այս գործի քննությունը վերսկսվեց այլ քննիչի կողմից։ Սաշա Դավթյանը՝ աղջկա հայրը, մեղադրվում էր իր դուստր Շ.Դ.-ին բռնաբարելու և իր երկու դուստրերին՝ Շ.Դ-ին և Թ.Դ-ին խոշտանգելու մեջ՝ ՀՀ քրեական օրենսգրքի 138.2 (3) 119.2 (1) և 119.2 (3) հոդվածներով, որոնք նախատեսում են 4-10 եւ 3-7 տարի ազատազրկում համապատասխանաբար։
2009թ. օգոստոսին Շ.Դ.-ն և Թ.Դ.-ն հրաժարվեցին իրենց ցուցմունքներից և բողոք ներկայացրեցին Գլխավոր Դատախազություն։ Շ.Դ.-ն, ում 18 տարին լրացել է 2009թ. ապրիլին, դատական նիստերից մեկի ժամանակ հայտնեց, թե ինչպես են այդ ցուցմունքները նրանից կորզել։ Նա հաղորդեց, որ իրեն և իր քրոջը՝ Թ.Դ.-ին Կենտրոն ոստիկանություն են տարել 2009թ.-ի մայիսի 7-ին և չորս օր շարունակ ենթարկել են խոշտանգումների, անմարդկային և արժանապատվությունը նվվաստացնող վերաբերմունքի, ստիպել են ցուցմունքներ տալ, որ Սաշա Դավթյանն իսկապես խոշտանգել է և բռնաբարել է Շ.Դ.-ին։ Ֆիզիկական բռնությունների արդյունքում կորզված ցուցմունքերը դրվել են մեղադրանքի հիմքում։
Սաշա Դավթյանին նույնպես պարբերաբար ծեծի և խոշտանգումների են ենթարկել։
Մարդու իրավունքների միջազգային ֆեդերացիայի (FIDH) նախագահը՝ Սուեր Բելասենը, ով 2010թ. փետրվարի 5-ին Քաղաքացիական հասարակության ինստիտուտի (ՔՀԻ) նախագահ Արման Դանիելյանի հետ այցելել է քրեակատարողական հիմնարկ Սաշա Դավթյանի հետ հանդիպելու, արձանագրեց, որ վերջինս ենթարկվել է արժանապատվությունը նվաստացնող վերաբերմունքի, և 8 ատամները կոտրվել են ծեծի արդյունքում։ Նրանք նաև հանդիպել են «Նուբարաշենի» քրեակատարողական հիմնարկի ղեկավարի և բժշկի հետ, ով ներկայացրել է բժշկական փաստաթղթերը՝ հաստատելով, որ քրեակատարողական հիմնարկ ընդունելիս պրն. Դավթյանը շատ վատ առողջական վիճակ է ունեցել։
2009թ. դեկտեմբերի 17-ին Արագածոտնի մարզի ընդհանուր իրավասության դատարանը արդարացրեց Սաշա Դավթյանին՝ իր դստերը բռնաբարելու մեղադրանքի մասով։ Չնայած նա և իր դուստրերը ակնհայտորեն ենթարկվել էին ֆիզիկական ճնշումներին, նրան մեղավոր են ճանաչել իր դուստրերին խոշտանգելու համար և 4 տարվա ազատազրկման են դատապարտել ՀՀ քրեական օրենսգրքի 119 հոդվածի 2-րդ մասի 1-ին եւ 3-րդ կետերի հիման վրա։
14.01.2010թ.-ին Սաշա Դավթյանը բողոքարկել է առաջին ատյանի դատարանի որոշումը ՀՀ վերաքննիչ դատարան։ Փետրվարի 26-ին Վերաքննիչ դատարանում սկսվեց և ավարտվեց Արագածոտնի մարզի Սաշա Դավթյանի բողոքի քննությունը, որով վերջինս խնդրել էր մասնակիորեն բեկանել իր նկատմամբ առաջին ատյանի դատարանի կողմից կայացրած վճիռը ՀՀ քր.օրի 119 հոդվածը (խոշտանգում) և մեղմ պատիժ սահմանել։ Դատարանը 3 տարվա ազատազրկման փոխարինեց Սաշա Դավթյանի պատիժը և կիրառելով ՀՀ ԱԺ-ի համաներում հայտարարելու մասին որոշումը' ազատ արձակեց նրան։
2010թ. մարտի 16-ին ՀՀ գլխավոր դատախազությունը բողոք է ներկայացրել ՀՀ Վճռաբեկ դատարան ընդդեմ ՀՀ Վերաքննիչ դատարանի որոշման, որը վերադարձվել է:
2010թ. Մարտի 9-ին Մարդու իրավունքների միջազգային ֆեդերացիան (FIDH) և Քաղաքացիական հասարակության ինստիտուտ հկ-ն հանդես են եկել հայտարարությամբ, որում ողջունել են Սաշա Դավթյանի ազատ արձակումը և կոչ են արել անհապաղ քննություն անցկացնել նրան խոշտանգումների ենթարկելու վերաբերյալ։
Սաշա Դավթյանին և նրա դուստրերին խոշտանգումների ենթարկած ոստիկաններից որևէ մեկն առ այսօր պատասխանատվության չի ենթարկվել:
hra.am
