«Արթուր Գրիգորյանն ընդդեմ «Հրապարակ» օրաթերթի» գործով դատաքննությունն ավարտվեց:Մարտի 7-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գ. Խանդանյանը կհրապարակի վճիռը։
Գործի նկարագրությունը
Փաստաբան Արթուր Գրիգորյանը, վիրավորվելով «Հրապարակ» թերթի էլեկտրոնային կայքում՝ hraparak.am-ում դեռևս օգոստոսին տեղադրված հոդվածի տակ երկու ընթերցողների թողած մեկնաբանություններից, իր պատիվն ու արժանապատվությունը վիրավորելու համար 18 միլիոն դրամ փոխհատուցում ստանալու պահանջով դիմել է դատարան ընդդեմ «Հրապարակ» օրաթերթի:
Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գագիկ Խանդանյանը նախ որոշեց «Հրապարակ» օրաթերթի դրամական միջոցների վրա արգելանք դնել, բայց հաջորդ օրը՝ նոյեմբերի 8-ին, փոխեց իր որոշումը՝ այն փոխարինելով գույքի վրա կալանք դնելու որոշմամբ:
Մեկնաբանությունների մեջ քաղաքացիներից մեկը գրել էր, կորցրել է մի գործով բողոքարկելու իրավունքը փաստաբան Արթուր Գրիգորյանի կողմից բողոքը ուշացնելու պատճառով, մեկ այլ քաղաքացի գրել էր, որ փաստաբանը 600 հազար դրամ է վերցրել իրենից և հարցը փորձել է միջնորդություններով լուծել:
Դատական նիստերին զուգահեռ ՀՀ սահմանադրական դատարանը (ՍԴ) նոյեմբերի 15-ին քննեց ՀՀ ՄԻՊ Կարեն Անդրեասյանի դիմումը, որով նա խնդրում էր Քաղաքացիական օրենսգրքի 1087.1 հոդվածը (Պատվին, արժանապատվությանը կամ գործարար համբավին պատճառված վնասի հատուցման կարգը և պայմանները) հակասահմանադրական ճանաչել:
ՍԴ-ն այն հակասահմանադրական չճանաչեց, ուղղակի իր որոշման մեջ ամրագրեց մի շարք կարևոր իրավական մեկնաբանություններ, որոնցից մեկն էլ վերաբերում է վնասի փոխհատուցման իրավաչափությանը, որը որոշելիս պատասխանողի սահմանափակ միջոցները պետք է դիտվեն որպես գործոն, հաշվի առնվի պատասխանողի եկամուտների չափը, չսահմանվի պատասխանողի համար անհամաչափ ծանր նյութական բեռ, որը վճռորոշ բացասական ֆինանսական ազդեցություն կունենա վերջինիս գործունեության համար՝ ընդհուպ մինչև սնանկության հասցնելը:
Այս որոշումը հաշվի առնելով Գրիգորյանի փաստաբան Աթանեսյանը ժամանակ խնդրեց դատարանից իրենց հայցադիմումը ՍԴ որոշմանը համապատասխանեցնելու համար՝ հետագայում հայտարարելով, որ օրաթերթին սնանկացման չենթարկելու համար առաջարկում է պատասխանողից բռնագանձել 18 միլիոն դրամը՝ ամսական 250 հազար ՀՀ դրամի չափով։
2012թ. հունվարի 13-ին ավարտվեց «Արթուր Գրիգորյանն ընդդեմ «Հրապարակ» օրաթերթի» գործով դատական նիստիերի նախապատրաստական մասը, և գործը մտավ դատաքննության փուլ։
Դատավոր Խանդանյանը որոշեց, որ մեկնաբանությունների իրականությանը համապատասխանելը պետք է ապացուցի «Հրապարակ» օրաթերթը, իսկ հայցվոր կողմը պետք է ապացուցի, որ այդ հրապարակումների հետևանքով վնաս է կրել։
Փետրվարի 24-ին կողմերը ներկայացրեցին իրենց ապացույցները. դատաքննությունն ավարտվեց: Մարտի 7-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գ. Խանդանյանը կհրապարակի վճիռը։
hra.am
